O Museo do Mar de Galicia nace xa reforzado na súa orientación marítima polo seu propio emprazamento, o do mesmo litoral da ría, na denominada Punta de Muíño sita na parroquia de Alcabre. Este entrante de terra no mar, tan característico destas costas, permite contemplar toda a extensión da ría, desde o estreito de Rande ata as illas Cíes, cun perfil recortado en mar aberto. A autoría do proxecto inicial é de Aldo Rossi e César Portela, se ben foi este último que se fixo cargo da súa execución incorporando variacións sempre acordes coa idea orixinal. Cualidade distintiva deste proxecto é a súa condición de conxunto urbanístico no que se integran distintos edificios e espacios ao aire libre delimitados por un muro perimetral e polo propio mar. A articulación de todos os elementos permite unha transición sen ruptura desde a terra firme, con clara vocación urbana, ata o mar, reflexo mesmo dun país no que non existen límites precisos entre o urbano e o contorno natural. O percorrido do conxunto, aínda sendo flexible, está proxectado cunha marcada intención racional que persegue combinar o deleite da contemplación da paisaxe coas máis altas esixencias de funcionalidade museolóxica.